Gemeentebelangen Bedum
   

Zebra

Van week hemmen wie t beleefd. GB dainde n motie ien over versnellensprozedure veur n zebroapad. Zoaans zuks ien begriebelke amtenoarentoal gait. “De raad van de gemeente bijeen komma, gelet op komma, constaterende, van mening zijnde, beseffende, is van mening, en gaat over tot de orde van de dag. En dat veur vief streepkes tussen Dietvorst en Kesh zee börgmeester.  Hai bedoulde Mourits, mor ja hai woont hier ook nog mor 20 joar en aans ie nog mor n haalf joar börgmeester binnen, kin je ook nait àlles waiten.

Wereldnijs zollen joe dènken. Nee dus. Allint n leutje maggeltje ien regiostukje van Dagblad van t Noorden. Schane aans t wicht van Heite der zó veul waark van had het. Mor der binnen meer werelddingen dij ook mor krapaan belicht binnen van week. Neem no dij fattteg bladkörven van Hoogeveen woar mor vaaier van overbleven binnen wegens  bezunegens , volgens Daniël Lohues ien ien zien collum. Àntierekloame van dij foute Sunnerkloas  film waarkt wèl! Zo te lezen ien n aaner knipsel van Dirk Stelder. Hailendaal aans Dick Moas oetleg geft over dij roare neef van Sunt. En aans Huub Stoabel der nog n schepke bovenop dut, van “  kiender dou joen onnerboksem nait omdeel, omreden der kin wel n foude bisschop ien dat sunnerkloaspak zitten”. Din krieg ie vanzulm wel n proces verboal aan t gat, mor film is optimoal promoot. Of neem Geert van week. Geert mit zien avvekoat Bram. Baid bie zulde kabber zo te zain. Baid mit zoo`n matraske op kop. Dij wollen ook geernd n oetsproak dochten wie, tot dat zai rechtbaank aanziet schoven, en der gain oetsproak kwam. Mor t was wel sproakmoakend, en doar kin je wat van leren.

GB haar ook eefkes wat beder noadenken mouten. Mit t nuimen van n zebroapad, mit ien achterkop “minder bezuikers en faillisement draaigt veur daairentoen Emmen”, hoalen joe kraant nait. Aans ie no schreven haren,  “wie addobteren n zebroa ien Beem om daaierntoen ien bainen te hollen”, was t aal beder west. n Zebroa het n hoog aaiboarhaidsgehalte, begriepen ie wel. Wat nog beder was. Proat nait over n zébroa pad, mor over n teVèlde pad. CDAer gaait mit pensioun toch òf. Sleept allint mor ellèn achter hom aan. Wil doar rest van zien levend gain aandenken aan hemmen, en haar vot doalk tougeven aan n zebroapad, wat ìk joe zeg! En haar streepkes van oversteekpad wat smaler mokt, wegens bezunegens. Hemmen ie PvdA Bonnemoa en Swaart ook aan joen zied. Wat kin joe dij fractieveurzidder Wijnstroa din nog wieder verekken! Loat CUer Jan Baarghoes zulm mor jankend mit n kollektebus bie deuren laans goan veur zien aigen zebroapad. Mit zukswat dòar haolen joe veurpagina`s mit, …èn n oversteek, ducht mie! Mor ie maggen der ook aans over prakkezaiern. 

Ottie

Share
comments
   

Wie is online  

We hebben 27 gasten en geen leden online

   

Statistieken  

   
© Gemeentebelangen Bedum