Gemeentebelangen Bedum
   

Help, help k bin beroofd!

Goi daag lu, wie mouten t over verkaizens hemmen, mor eerst wil k joe even mit mie mitnemen noar Stad.
Op Zuderdaip wer n ollere vraauw deur n veulpleger van heur knip, zeg mor heur aigendom beroofd. “Help, help”, raip t mins, “ k wor bestolen!”. n Jong kerel buulde der achteraan en greep rover. “Blief van mie òf”’, raip rover, “veurege keer dee k dat ook en dou zee gain ain der wat van, dus mag dat bliekboar”, zee veulpleger. “Doadelk teruggeven”, zee jongkerel.
t Ol minske gaf jong kerel n tienje en rover aìn euro.
Meschain, hail meschain, dat rover hier wat van opstoken het.
Zukswat is ook mit verkaizensborden ien Beem gebeurd heb k heurd, hemmen joe dat ook?
Hemmen ie revoazie ien verkaizenslaand ook zain mit dij dikke störm van òflopen weekend?  Pientere hondje van GB haar eerst poten te gat oetlopen, dou was t lief foetsie en daag loader was smoeltje van nuvere wichtje zulm ook vot. Bordercollie zel wel aan schoapendrieven weden.
Zuneghaid troef bie GB banners. Aal poaltjes knikt. Krekt, aigen schuld.
Dakpaanlatten haiten nait veur niks zo!
Pamfletten rabbelden van borden. Mainsten binnen weerom behalven CU.
CU las ik, wil verbienden, mor wel het goie plaksel veur dij club! 

Nog mor vaaier week en din is t zo wied.  Gelukkeg, fik gaait ter ien!

VVD het ter drij bordjes bie zet mit knupte pakjestaauw, das gain oetstroalen veur n stropdazenpartij, mor joa nije aanloop hè.
Aal mit aal lopen kerkgaangers van blaauwe pamfletten zundoags no tussen hemmel Gb bord en n dubbele schelle oet t lood VVD bord, mit rood nijlon-taauw en n poar rongen deur ombogen houkiezers, noar Kerk tou.
Even wiederop het veurman van CDA zien roam haildaal volplakt mit n groot plekoat, dij van Gemaaintegrefier nait op achterkaant borden mog. k Wol joe der op wiezen dat ter links boven ien houk n loergatje zat woar sums n blaauw en din weer n broen oog deurhin koekeloerde om te zain hou veurbiegaanger reageerden. Te loat!. Pampier is vot.
Der is no n drijhoukje op kezien timmerd, dij moakeloars ook bruken bie  verkopen van hoezen. Zol CDA te koop stoan?
Guster zag k n nait PvdA lid mit n kregen rood zoadeldekje! “Kin k t gat mit ofwizzen”,  zee hai. Hai toch! Ien verkaizenstied  kin je van alles verwachten!  

Vaaier meert kin elkenain bekieken hou of Beem der ien toukomst oet zain kin. Das ain ding!  Aner ding is, of anere plougjes van gemainteroad ook kommen kieken. Kinnen ie vot ienschatten wel der wèl en wel der naìt mit pazziepanten van 3D ien zee willen noa verkaizens. 

“Gain ienteelt minsen, wel komt ter bie roedel van aacht Laandhonden?  
k Bin benijd.

Ottie

Share
comments
   

Wie is online  

We hebben 66 gasten en geen leden online

   
© Gemeentebelangen Bedum