Gemeentebelangen Bedum
   

Schoem op t wodder?

Beste wichter en laive jonges. Veul zegen ient Nijjoar. Vanoet dörp bedankt dat ie der gain dikke bende van moakt hemmen en t vuurwaark haar minder kint. k Bin weerom zunner Hals und Beinbruch. Knap hè dat k onner t glieboanjen deur ook nog n beetje Duuts oppikt heb, of nait din?. k Heb nog meer mit weerom nomen: wat nijs veur Gemaainte en veur joe altmoal. Haildaal nij is t ook weer nait, mor weerd om te vermeln. Wat is noamelk  t geval. Wie zaten mit n kobbel jonges en wichter ien ain Feriënhaus.

Noa afterski , tussen hoakjes ( Ingels is ook aal aans snij ien Oostenriek deelvalen) waren wie vanzulm noa n stuk of wat Schnapsen nuver aan t swaiten kommen. Aans wie din thoes kwamen gingen wie eerst even onner does, veurdat wie aan de Rösti en Bratwursten gingen .

En no komt t: elk mit zien aigen zaipke onner kroan. Woarom zeg k dat? Aans ie op wintervekaanzie goan mit n kobbeltje din zain ie overainkomsten ien snij. Elk viend aal wit en glad. Verschillen bemaarken ie mit wasken. Noamelk elk het zien aigen geureg kleurd stukje zaip.

Das ien politiek krekt zo. Aans elk zien handen ien onschuld wasket, wil elk dat ien aigen kleur en geur doun. No heb k doar te min snöt veur boven ogen. Mor k heur ook wel ais wat, aans der strond aan de knikker is. Bie ons kwam der hakketakkerij op t ên van vekaanzie 

Noamelk: elk zien stukje zaip wer zo klain dat hai of zai zuch der nait appaart mit wasken kon. Wie hemmen nog perbaierd om n poar stukken zaip tot aìn gehail te kniepen, mor k wait nait of ie dat wel ais oetfigelaaierd hemmen, dat wil nait meer tegensworeg.

 n Joar of wat leden, kin k mie nog heugen ging dat wel. Of der gain plak of te min ozzevet ien zaip zit ? Laimeneer mag t waiten, mor t wil nait meer. Dus stonnen wie ien twijstried.  Nait meer wasken of wat aans oetvienen.

En din bliekt mor weer dat ien nood en ien oorlogstied, t mensdom vindingriek weden kin.

Op wc`s ien Oostenriek liggen noamelk beduurde geurpuutjes mit kruden.

Ien dij hoakte puutjes hemmen wie aal stukjes zaip doan. Elk zien geur was te roeken. Elk wer hemmel en wie hemmen ons nog doagen laang aans n aindudege kobbel handhoaven kind .

K Wil mor zeggen aans elk zien geur en kleur ien Gemaaiteroad no ais ien aìn puutje dut en ie  goan doarmit domt noar pervinzie veur n rondom weg, din kin der wel ais n dikke schoemende puut mit geld oet rollen.

Wat n schieterg klaain stukje zaip meschain aal nait te weeg bringen kin! Of nait din? .

Ottie

Share
comments
   

Wie is online  

We hebben 70 gasten en geen leden online

   
© Gemeentebelangen Bedum