Gemeentebelangen Bedum
   

Abbeltoarten

k Zit op outoboan onnerwegens noar snij en mout nog n stukje schrieven. Normoal dou k dat thoes, mor mit dij leptoppen tegenwoordeg  kin dat ook onnerweegs. k Klik op Gemanite Beem om t videootje even òf te zain. Doar komt e. Altmoal schoevende en proatende minsen om n ronde toavel Òp toavel het elk vanzulm n stoabel papperazzen en kovvie en k zai abbeltoart ! 

t Liekt mie n gezellege boudel..

Doar begunt twijde veurzitter te proaten. Volgens griffier is t haalf aacht en k begun zegt proatsman. Mor hai begunt nait! Hai geft t woord aan Anti Revolutionair Wijnstroa. Dij is ducht mie bang, dat e t nait allint òfkin en nait wies genog is. Hai vragt om hulptroepen van boven. k Moak  ter oet op, dat veurege spreker meer onner pet dinkt te hemmen, aans haar dij t zulf wel doan. De man ien t midden vragt of elk zuch ien agenda vienen kin. Elk slagt aan t bloadern en zai vienen zich zulmen schienboar. Zai hemmen gain aanmaarkens op heur aigen petretten zo te zain. Zai nikkoppen altemoal, op ain noa. Dij schutkopt, is zien aigen petret kwiet zo te zain. Dijzulde, A.R.W.dut n bepoalde vinger omhoog. Hai wil punt tien tot vattien aans hoamerstuk behandeld hemmen, behaalve dattien.

Veurzitter dij hom t kees nait van brood of eten let, antwoordt, dat aans  geachte leden dit n beetje soepel hantaiern dit ook nait zolaang duren huift. En dou kwam t Wie goan dit nait òfhoamern, omreden k wil mit veurzittershoamer nait op abbeltoarten sloagen zee e. Pats! Vot was t beeld. Zes minuut, nul, drij gaf mien schaarmke aan. k Perbaaierde t opnij. Mor weer bie zes minuten en drij sekonden was t doan.

En no mout k wieder schrieven over t wat en t woarom dit zò doan wort deur ons college. k Wil waiten woarom der n publieksstilte ien acht nomen wort ien dizze vergoadern.

No kin t ook zo weden omreden GB t ien n veurege vergoadern  over n perbaisel van hondestrond oproemen haar, dat zai krekt aans ien Gemaainte Olddambt der n “Voedselbaank veur Honden en Katten” aan vast knuppen wollen. GB wil ja haid veuraan lopen!

Mor dat is n gissen. Mor t kin ook weden dat koalitie bie meerderhaid besloten het: Wie vreten t zulm mit nkanner op, omreden t zaag der wel lekker oet! En dat kin wel achtergrond weden van dit abrupt end van dizze  videovergoadern. Ien zo n officieel gebeuren magen ie vanzulm ook nait mit volle mond proaten! Aans k nait mit broken bainen oet snij weerom kom, tot n aander moal mor weer. Vredeg Midwinter en nog  Veul Zegen ien t Nij-joar.

Ottie

Share
comments
   

Wie is online  

We hebben 73 gasten en geen leden online

   
© Gemeentebelangen Bedum