Seks in de City
Wat zellen ze domt weer broen terug kommen van boetenlaanze vekaanzieraaizen. Aal dij lu, dij der omreden dat zai der zo seksie oetzain wollen en doarom noar Spanje en Turkije en vergeet nait noar dat aarme Griekenlaand west binnen.
Wat biekommen van zörgen en waarken of slimmer nog, prakkezaiern hou of je weer waark kriegen kinnen vanzulms.
Veur de thoesblievers waren der dis keer ook prachtege baauwvakweken, man nog aan tou.
Veur joen infermoatsie lu, dij ien boetenlaand zaten, wie hemmen hier zulfs hittegolven had en natuurrampen.
Dikke onweersbuien haren wie, mit slagregens. t Wotter golfde deur stroaten hin. En onweersloagen, roamen stonden te trillen ien sponnings. Mainsten gingen bie daglicht t hoes weer noakieken, of der ook nog meer scheuren ien muren kommen waren veur de oardbevensvezekern van de NAM, zo ging ter heer.
Oet koatjes dij ie noar dörp stuurd hemmen is te zain dat ie haalf noakend en hier en doar haildaal zunner boksem om t gat op zudelke stranden lagen Dat zel mie doar n Sodem en Gomorroa west hemmen.
As ie docht hemmen dij aarme thoesblievers zitten doar mor op n dreugje? Vergis joe nait minsen
As kompesoatie veur de echte aigenhaimers het ons Gemaainte rondom Beem dizze zummer seksstrippen aanlegd !
Seksstrippen zellen ie denken? Joazeker!.
Wie pakken soavens ons fiets mit kijhaard oppompte banden en din rabbeln ale thoesblievers ien kolonne over de fibroatiestrippen aan kaant van Noordwolderweg en Terloan
Ie waiten der nait van, zulfs ollen van doagen kommen weer ien twijde jeugd op heur Veeno-opoefiets .
Dismoal hemmen wie broene aarms en… Seks in de City.
Zuik dat no mor ais ien t boetenlaand!
Wie blieven mooi thoes.
Ottie