“Hallo mit mie, hou gaait ter mit?”
“Wat schier das mie bels Femke. Bin krekt weerom oet snij en vaal hier mit t gat ien bodderpot”.
“Ien Vraize of ien Domo bodder Ottie?”
” Wat dochst ien Friesland-foods-Domo bodder vanzulf, k woon hierzo.” “No doe mie toch aan lien hest, wil k die even melden wat dij bodderpot lös moakt het. Wat is noamelk t geval? Dij bolsjewieken, woar k die aal n moal of wat melden van doan heb, hemmen hail dörp weer ien t ên jachd, mit n handtaikenaktie. Let wel, veur n vraauwelke ontsloetensweg , woar k die ien n veureg schrieven aal wat over meld heb. Handtaikenpampieren vlaigen joe hier om oren en bie aal ons krudeniers hemmen zai grode stembuzzen stoan dij deur Gemaainte vergees oetlaind binnen. Ain of aaner handege jongkerel het ter bredjes op knuterd woar ook van dij "Tekenhier" paperazzen op liggen. Der stoan weer rekloamebreden ien t laand en aankommend week willen zai zuls maart op, mos noagoan, en...”
“Dat kin nèt Ottie”
“Dat vien k ook Femke. Om nog evenpies wieder te proaten t is zulfs al ien ons Gemaaintehoes op toavel west. Doar vlogen ze mekander sikkom ien t hoar wicht. Der was zulms ain bie dij handtaikens boeten dörp nait geldeg verkloaren wol. No kin k mie doar wat bie veurstellen omreden dij persoon het wel ains de kuierlatten onder, noar joen pervinzie en den rust hai doar wel ais oet op n baankje. Mor Femke, wat k zeggen wil, din binnen ie toch nog nait zo n stoere Vraaize- stabij hond, dat ie zeggen kinnen “Vraislaand boppe, handtaikens in de groppe! En nog wat, wicht ie magen joen Mem ien Ljouwert bie Vijmaarthallen stoan hemmen en n Sven Kroamer, mor wie hemmen ons aigen kou bie Domo en onze Marianne Timmer
Hest "t Wicht van Achterdaip" zodderdaag nog zain op Teevee?”
“Ho ais evens mit dat gebloas, reudeltaande Ottie das doe bist. Sven het no even n scheur ien zien boksemke, mor reken der op dat dij weeromkomt. Ons Mem blift bie ons ien Ljouwert en wat dij Vraizehandtaikens aan gait, zol k ook zeggen dat kin nèt.”
“Krekt. Blied das dat ook viens, dat dit nèt aangoan kin. Dus doe viens ook dat ze mor deurbroezen mouten. Blied te heuren Femke. Even veur dien info en statestieken. Mit n dag of wat goan ze deur de viefhonderd handtaiken hin, mor der word aal proat over doezenden maggels veur Pervinzie. Doe begrips din hemmen wie Vraislaand ook neudeg. Bist toch wel n beedje tröts aans Friesland-food-Domo heurs? Kins ook mit kompjoeter stemmen Femke ,das dat even wais. Huift ter gain traainkoartje aan spandaaiern. No schier wicht, das doe mie ook eefkes bieproat hest en dat wie t aans femilie t weer gloepend ains binnen mit nkander, dat dut mie goud. Tot n aaner moal. Moi hè”.
Ottie